Já, já, ég fór nánast til Mexíkó í dag. Við flugum suður að landamærum í bæ sem heitir Nogales. Það var nú ekki mikið um að vera á þessum blessaða flugvelli og skil ég eiginlega ekki alveg afhverju hann heitir Nogales "International"! En við fórum með taxa niður í bæinn sjálfann. Skoðuðum okkur reyndar ekkert um, en fengum okkur að borða á einhverjum veitingastað. Ætluðum sko aldeilis að fá okkur ekta mexíkanskan mat þar sem við vorum svona nálægt landamærunum, en þvílík vonbrigði! Hef sjaldan smakkað eins vondan mat á ævinni! Fékk mér einhvern rétt með blönduðum réttum, eitthvað sem átti að vera með nautakjöti, en held að hafi verið með kjúklingi og þá versta kjúklingi sem ég hef smakkað! Hann var eitthvað svo þurr og skrítinn á bragðið.

Svo kom þjónninn með einhvern búðing í eftirrétt fyrir okkur og ég get svo svarið það að það leit út eins og hann hefði verið búinn að snýta sér í búðinginn og hræra saman! Samt bragðaðist búðingurinn alveg ágætlega en ég efast samt stórlega um að maður fari þarna aftur á þennan veitingastað. Það var allt mjög gamaldags þarna inni og var eins og maður hefði farið nokkra tugi ára aftur í tíman. Mjög spes.

En eftir þetta ævintýri fórum við aftur upp í vél og flugum heim á leið, lengsta yfirlandsflugið sem ég hef farið hérna hingað til en þau verða lengri á næstu dögum þar sem við eigum eftir að fara til L.A. á mánudag og svo Las Vegas, reyndar ekki fyrr en á miðvikudag eða fimmtudag, en það verður pottþétt í næstu viku!

Það er aðeins farið að kólna hérna hjá okkur. Ekkert samt geðveikt kalt, en það er orðið þokkalega svalt hérna á kvöldin. Maður kvartar nú samt ekkert! Annars alltaf sami hitinn yfir daginn, 35 til 37 stiga hiti, en það fer nú að detta aðeins niður núna þar sem "haustið" er víst komið í eyðimörkina!

Svo átti ég líka alveg eftir að tilkynna ykkur það að ég er kominn með ammerríst símanúmer: 001-480-277-1029. Endilega sláið á þráðinn og látið heyra í ykkur! Munið bara að ég er 5 klukkutímum á eftir ykkur!

Þetta er nóg... þetta er nóg...